زبانحال امام حسین (ع)
زبانحال امام حسین (ع)ازبه میدان رفتن حضرت عباس(ع)-اثر مرحوم حاج سید حسین کهنموئی
قارداشیم عباس ئولوبدور قامتیم خم دور باجی
بو مصیبت هامی پیش آمددن اعظم دور باجی
اوخلانیب سو مشکی، قوللاری بد‌ندن آیریلیب
یرده بی صاحیب قالان شمشیر و پرچم دور باجی
هر نه قوت وار قوشوندا قوّه ی پرچم ده وار
پرچمی حفظ ایلین بیر بازوی محکم ده وار
نه دیوم قارداشیمون چوخ سؤزلری سینمده وار
درد ومحنتله دولان بو یاره سینمدور باجی
تا أسردی پرچمی لشگر هامی دیلشادیدی
وعده ی نصرتله ویران قلب لر آبادیدی
هر قدر کی دوشمه میشدی قوللاری آزادیدی
من گؤروردوم قارداشیم جنگه مصمّم دور باجی
تا آلوردی قارداشیم تشنه اوشاقلارین سسین
قصد ائدیردی ساکت ائتسین آغلایانلار ناله سین
مشگی دولدوردی چیخوب لشگر آلوبدور دوره سین
یوز قویوبدور خیمه‌گاهه قصدی محکم دور باجی
دوشدی سس لشگر ابوالفضلی خیامه قویمیون
سو آپارسون بچّگان تشنه کامه قویمیون
قویمیون آزاد اولوب یتسون مرامه قویمیون
مرگینه قارداشیمون بو ایش مقدّم دور باجی
رتبه‌‌ی عباسیمه چوخلار چکیب رشک آغلادی
مشکینه بیر اوخ دگیبدیر حالینه مشک آغلادی
گؤردو سقّا سو هد‌ر گئتدی تؤکوب اشک آغلادی
قانه الوان یوزگؤزی اشکیله پُرنَم دور باجی
اونداکی سو مشکی اوخلاندی دگیشدیردی سؤزین
ایستدی تا گؤرمه سون تشنه اوشاقلارین یوزین
جان وئروب میدانیده غَمدن قوتارسین اؤز اؤزین
قارداشیم صاحب مقامات ومکرّم دیر باجی
سؤیله دی قارداش حسین گل درک ائیله قارداشیوی
قارداشون جان تاپشیرور آچ باشی اوسته باشیوی
آغلا قارداشون اؤلور تؤک عاریضه گؤز یاشیوی
ایکی قارداش یوزیوزه قویسا نه عالم دور باجی
بیله بولمه حالت غمگینی یاددان سالمارام
انتقامین قارداشیمون اشقیادن آلمارام
قارداشیم عباس ئولوبدور منده ئولّم قالمارام
دستگیر اولماق سیزه بی شک مسلّم دور باجی
قارداشیمون پئیکری قولسوز جفادن اوخلانوب
حملی ممکن اولمادی قطعه به قطعه دوغرانوب
قارداشیم حالین گؤر‌ندن اود توتوب قلبیم یانوب
بو غمیم گلمز حسابه چوخ بؤیوک غمدور باجی
قارداشیم نعشین قویوب میداندا یالقوز گلمیشم
پیکری پاره دوشوبدور یئرده قولسوز گلمیشم
قالموشام بو چؤلده قارداشسیز اوغولسوز گلمیشم
حالتی قارداشیمین گؤزده مجسّم دور باجی
“کهنموئی” بیزلره خادمدی سید دور اوزی
ایلوری خدمت شفاعتده مسلّم دور گوزی
ظاهرا بیچاره دور اما یازوبدور بو سوزی
موقع خدمتدی چون ماه محرم دور باجی
2 پاسخ
چوخ گوزل
الله رحمت السین استاد کهنموئی یه
انشاالله اربعین ،کربلا
ممنون که نام و یاد این شاعر و مفسّر بزرگ رو زنده نگه میدارید.
اجرتون با سید الشهداء