وصیت حضرت زهرا (س) به حضرت علی (ع) – شعری از مرحوم حاج سیدحسین کهنموئی

شعر شهادت حضرت فاطمه (س)

شعر شهادت حضرت فاطمه یا فاطمه زهرا س

شعر شهادت حضرت فاطمه (س) – وصیت حضرت زهرای مرضیه (س) به حضرت امیرالمومنین(ع) از مرحوم حاج سیّد حسین کهنموئی

گل جان ویرورم آیریلورام سندن عم اوغلی
آیریلما نه قدر ئولمه میشم مندن عم اوغلی

هر دم ئولوم آثاری اولور منده نمایان
صون وقتلریمدور منیم ای سرور دوران
قرآن سسیوی چوخ سویرم گَل اوخی قرآن
آیریلما نه قدر ئولمه میشم مندن عم اوغلی

بلبل ستم خاریله آیریلدی چمندن
من دویمادیم عالمده حسینیله حسندن
آز قالدی چخا فاطمه نین روحی بدندن
آیریلما نه قدر ئولمه میشم مندن عم اوغلی

هرگز دیمورم آغلاما، یان سینوی داغلا
جان تاپشورورام آغلا، صاق اولسون باشون آغلا
قوی فاطمه ئولسون گوزون اوندان صورا باغلا
آیریلما نه قدر ئولمه میشم مندن عم اوغلی

جانیم سنه قربان اولا ای شاه ولایت
واردی بولوسن سینه ی زهراده جراحت
تاپشور مَلَکُ الموته آلا جانیمی راحت
آیریلما نه قدر ئولمه میشم مندن عم اوغلی

ازبس ایلیوبلر بو جماعت منه توهین
تشییعیمه قویما گله لر، دفن ایله گیزلین
قوی قبره منی نصف شب ایت قبریمی ایتگین
آیریلما نه قدر ئولمه میشم مندن عم اوغلی

یوخدور بولورم آیریلیقین دردینه چاره
هیهات گورم گل یوزیوی بیرده دوباره
گل آل دیزون اوسته باشیمی گیتمه کناره
آیریلما نه قدر ئولمه میشم مندن عم اوغلی

ویرموش اوز آتام مژده که سن تیز ئوله جاقسان
چوخ اینجیموسن شاد اولاجاقسان گوله جاقسان
دین خدمتی نون قیمتین اوندا بوله جاقسان
آیریلما نه قدر ئولمه میشم مندن عم اوغلی

ناحق چالیشور ثروت دنیانی آپارسون
مومن چالیشور قبرینه ایمانی آپارسون
گلدی اوز آتام غمزده زهرانی آپارسون
آیریلما نه قدر ئولمه میشم مندن عم اوغلی

چوخ اینجیموسن رنجش درد و محنیمده
بیر زحمتیم آرتار سنه غسل و کفنیمده
پیراهنیمی قوی قالا یورقون بدنیمده
آیریلما نه قدر ئولمه میشم مندن عم اوغلی

بیر غم دیمه هرگز قویار آسوده من ئولّم
دشمن کسه جاق اوغلون حسین باشینی بولّم
خولی ایوینه شام غریبانینه گلّم
آیریلما نه قدر ئولمه میشم مندن عم اوغلی

دنیاده «ریاضی» ساییلور شیعه لروندن
آگاهدی فردای قیامت خبروندن
هنگام شفاعت اونی سالما نظروندن
آیریلما نه قدر ئولمه میشم مندن عم اوغلی

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *